Hún er ekki komin út en hún er á leiðinni. Og heitir Tugthúsið. Bók sem ég byrjaði að undirbúa seinni hluta ársins 2019, fór svo að taka á sig mynd frá vorinu 2020.
Mér skilst að hún eigi að birtast í búðum þann 20. október. Ef skipið ratar í land, afferming gengur samkvæmt áætlun og svo framvegis – ef gæfan lofar.
Ég ætlaði ekki að láta glitta í bókarkápuna hér eða annars staðar fyrr en á þeim degi, vildi leyfa bókinni að birtast í heilu lagi, ef ekki eins og þruma úr heiðskíru lofti þá eins og skrattinn úr sauðarleggnum. Eða álfur úr hól. En Bókatíðindi eru komin á netið og þar blasir bæði kápan og stuttur kynningartexti við hverjum sem gáir. Svo það er ekki seinna vænna að ég hafi líka orð á þessu sjálfur. Að það verður bók.
Útgefandi: Mál og menning.
Meira: síðar.